बाँके ।लुम्बिनी प्रदेशका मुख्यमन्त्री चेतनारायण आचार्यले इस्लाम धर्मावलम्बीहरूले हर्षोल्लासपूर्वक मनाउने पैगम्बर मोहम्मदको जन्मजयन्ती (ईद मिलाद नवी) का अवसरमा इस्लाम धर्मावलम्बी समुदायलाई सुख, शान्ति, समृद्धि, सु-स्वास्थ्य, दीर्घायु, र उत्तरोत्तर प्रगतिको शुभकामना व्यक्त गर्नुभएको छ।

मुख्यमन्त्री आचार्यले सोमबार शुभकामना सन्देश जारी गर्दै यो पर्वले सबैप्रति करुणा गर्न, तथा संसारभरका मानव जातिलाई पैगम्बर मोहम्मदका शुभ सन्देशहरू पु¥याउँदै धार्मिक सद्भावको प्रवर्द्धन गर्न महत्त्वपूर्ण भूमिका खेल्ने स्मरण गराउनुभयो।

पैगम्बर मोहम्मदको जन्म इस्लामिक पात्रो हिजरी सम्वत्को रवि उल अव्वल महिनाको १२ तारिखका दिन भएको मानिन्छ। इस्लाम धर्ममा यो दिनलाई ‘मोहम्मद डे’ भनेर विशेष महत्त्वका साथ मनाइन्छ। यस अवसरमा विभिन्न धार्मिक कार्यक्रमहरू गर्दै इस्लाम धर्मावलम्बीहरूले अल्लाहको पुकारा गर्ने, पैगम्बर मोहम्मदका उपदेश सुन्ने, कुरान सुन्ने, र सामूहिक भोज आयोजना गर्ने परम्परा छ।

लुम्बिनी प्रदेशका इस्लाम समुदायको बसोबास रहेका विभिन्न जिल्लाहरूमा धूमधामका साथ यो पर्व मनाइँदैछ।