सरला सुवेदी
१९, भाद्र २०८१

बाँके ।बाँकेमा वर्षाको मौसमसँगै अत्यधिक गर्मीको कारण भाइरल ज्वरो, रुघाखोकी, टाइफाइड, र पखालाका बिरामीको संख्या बढ्दै गएको छ। नेपालगन्जस्थित भेरी अस्पताल, नेपालगन्ज मेडिकल कलेज, सिद्धार्थ अस्पताल, कान्ति आरोग्य अस्पताल, र कोहलपुरस्थित मेडिकल कलेजलगायतका अस्पतालहरूमा दैनिक पाँचदेखि एक हजारसम्म बिरामी उपचारका लागि आइरहेका छन्।

 

भेरी अस्पताल नेपालगन्जका सूचना अधिकारी डा. संकेतकुमार रिसालका अनुसार, पछिल्लो केही दिनदेखि मौसमी रोगका बिरामीको संख्या उल्लेख्य रूपमा बढेको छ। भेरी अस्पतालमा मात्रै दैनिक तीन सयभन्दा बढी बिरामीहरू भाइरल ज्वरो, रुघाखोकी, टाइफाइड, झाडापखाला, र निमोनियाजस्ता समस्याहरू लिएर उपचारका लागि आइरहेका छन्।

 

नेपालगन्ज मेडिकल कलेजको शिक्षण अस्पतालमा पनि दैनिक दुई सयभन्दा बढी मौसमी भाइरलका बिरामीको संख्यामा वृद्धि भएको छ। अस्पतालका सह-निर्देशक डा. रोमन किदवाईले अहिले मौसमी भाइरलका बिरामी धेरै बढेको बताउँदै, अस्पतालले उनीहरूको उपचारमा विशेष ध्यान दिएको जनाउनुभयो।

बाँकेका अन्य अस्पतालहरूमा पनि मौसमी फ्लुका बिरामीको संख्या बढ्दै गएको जनाइएको छ। भेरी अस्पतालमा झाडा पखालाका बिरामीहरूको उपचारका लागि छुट्टै वार्ड स्थापना गरिएको छ।