बाँके ।लुम्बिनी प्रदेशका मुख्यमन्त्री चेतनारायण आचार्यले लैंगिक समानताको कानुनी आधार निर्माण गर्दै कार्यान्वयनको चरणमा पुगेको बताउनु भएको छ। हरितालिका तीज पर्वको शुभकामना सन्देश जारी गर्दै उहाँले प्रदेश सरकारले २०८० पुस ६ गते स्वीकृत गरेको लुम्बिनी प्रदेश लैंगिक समानता नीति-२०८० बारे जानकारी गराउनुभयो।

 यो नीतिले प्रदेशको शासन र विकासलाई लैंगिक उत्तरदायी बनाउने, महिलाको अर्थपूर्ण सहभागिता सुनिश्चित गर्ने, र लैंगिक विभेद तथा हिंसाको अन्त्य गर्ने लक्ष्य राखेको छ।

मुख्यमन्त्री आचार्यले महिलाको आर्थिक, सामाजिक सशक्तीकरणलाई प्राथमिकतामा राखेर नीतिहरू अगाडि बढाउने योजना रहेको उल्लेख गर्नुभयो। उहाँले तीज पर्वले समाजमा भ्रातृत्व, सदाचार, एकता, र सामाजिक सद्भाव बढाउन महत्वपूर्ण भूमिका खेलेको भन्दै, यस पर्वले महिलाहरूलाई आफ्ना पीडा, दुःख र खुसी साझा गर्ने अवसर प्रदान गरेको बताउनुभयो।

उहाँको शुभकामना सन्देशमा तीज पर्वले महिलाको क्षमता र योग्यतालाई सम्मान गर्दै, हकअधिकार र स्वतन्त्रताको बारेमा जागरुकता फैलाउने काम गर्ने विश्वास व्यक्त गरिएको छ। साथै, उहाँले यस पर्वले समाजमा विद्यमान लैंगिक र जातीय विभेदको अन्त्य गर्दै, समतामूलक समाज निर्माण गर्न प्रेरित गर्ने विश्वास व्यक्त गर्नुभयो।

मुख्यमन्त्री आचार्यले मौलिक चाडहरूको गरिमा कायम राख्न, तीज पर्व मनाउने क्रममा देखिएको भड्किलोपन र खर्चिलोपनलाई हटाउँदै जानुपर्नेमा जोड दिनुभयो। अन्तमा, उहाँले हरितालिका तीज पर्वको अवसरमा सुख, शान्ति, र समृद्धिको शुभकामना व्यक्त गर्नुभयो।