३०, भाद्र २०८१

बर्दिया। उद्योग  तथा वाणिज्य र श्रम तथा उपभोक्ता हित समितिका सभापति एवं पूर्व खानेपानी मन्त्री, साथै जनमत पार्टीका उपाध्यक्ष अब्दुल खान आइतबार बिहान पार्टीको आन्तरिक बैठक र प्रशिक्षण कार्यक्रममा सहभागी हुन बर्दिया आइपुगेका छन्।

जनमत पार्टीको बर्दिया जिल्लाको गुलरीयामा आयोजित प्रशिक्षण कार्यक्रममा सहभागी हुन पुगेका खानले पार्टीको गतिविधि र आगामी योजनाहरुलाई सफल बनाउने उद्देश्यले प्रशिक्षणमा सहभागी हुने बताइएको छ। उनका स्वकीय सचिव इन्जिनियर अतिउल्लाह मुसलमानले यसबारे जानकारी दिएका हुन्।

उक्त प्रशिक्षण कार्यक्रममा प्रदेशस्तरीय केन्द्रीय सदस्यहरू, प्रदेश समिति पदाधिकारीहरू, जिल्ला संयोजक, तथा सम्बद्ध सदस्यहरूको उपस्थिति रहनेछ। पार्टीका उच्च नेतृत्वहरूको सहभागिता रहेको यस कार्यक्रममा जनमत पार्टीका अध्यक्ष डा. सिके राउतले समेत प्रशिक्षण दिने कार्यक्रम रहेको जनमत पार्टीले जानकारी दिएको छ।

पार्टीको संगठनात्मक सुदृढीकरण, राजनीतिक लक्ष्य र भावी कार्यदिशाको स्पष्टताको लागि आयोजना गरिएको यस प्रशिक्षण कार्यक्रममा, विशेष गरी प्रदेश र जिल्लास्तरीय नेतृत्वलाई मार्गदर्शन दिइने अपेक्षा गरिएको छ।