२५, भाद्र २०८१

बाँके । राष्ट्रिय युवा संघ नेपाल जिल्ला कमिटीले आज एक प्रेस विज्ञप्ति जारी गर्दै बाँकेको राप्तीसोनारी गाउँपालिकाको विनौना चोकमा २०८१ भदौ १ गते भएको घटनामा संघका बाँके अध्यक्ष ज्ञानेन्द्रराज वलीलाई फसाउन खोजिएकोप्रति गम्भीर ध्यानाकर्षण भएको जनाएको छ।

संघका उपाध्यक्ष रमेश मिजार र बाँके इन्चार्ज विपेन्द्र लामा (कालु)द्वारा हस्ताक्षरित विज्ञप्तिमा, वलीलाई व्यक्तिगत र सामाजिक जीवन समाप्त गर्ने नियतले घटनास्थलमा अनुपस्थित रहेका व्यक्तिहरूलाई सुनियोजित तरिकाले सनाखत गराइएको उल्लेख छ।

राष्ट्रिय युवा संघ नेपाल नविनता, सिर्जनशीलता, गतिशीलता, परिवर्तन र निर्माणलाई प्रतिनिधित्व गर्ने मुलुकको अग्रणी राजनीतिक युवा संगठन हो। संघले नेपालको संविधान र संघीय लोकतान्त्रिक गणतन्त्रको रक्षा, विकास, र सुदृढीकरणमा सदैव प्रतिवद्ध रहेको बताएको छ।

घटनाको निष्पक्ष छानबिनको माग गर्दै, विज्ञप्तिमा स्थानीय प्रहरी प्रशासनको भूमिका अत्यन्तै शंकास्पद रहेको र निर्दोष व्यक्तिलाई फसाउने नियतले अदालतलाई समेत भ्रमित पार्ने प्रयास भएको आरोप लगाइएको छ। संघले घटनाको निष्पक्ष र न्यायपूर्ण सुनुवाइको माग गर्दै, यदि उचित कारवाही भएन भने देशव्यापी सशक्त आन्दोलन गर्न बाध्य हुने चेतावनीसमेत दिएको छ। उक्त आन्दोलनको जिम्मेवारी स्थानीय प्रहरी प्रशासनले लिनुपर्ने स्पष्ट पारिएको छ।